chand begana hai kaun is ko kahega apna
is ke haalat juda is ke maqamat juda

nau-damida kabhi kaamil kabhi napaid kabhi
bas yahi rang-e-talawwun hai tashakhkhus is ka

tare sargoshiyan karte rahe in ki tab-o-tab
in se achchhi ki rasai mere dil tak pai

chand ne socha mera qissa bhi mujh se behtar
jo wahan chalta raha gunj yahan tak aai

warna aafaq ki ye kar-r-gah-e-shisha-gari
is mein dhalti hain ajab bhed bhari simaen

qurb ki had se tajawuz ho to darpesh-e-fana
intiha duri ki chhu len to bikhar hi jaen

tab zamin ubhri mita wahima-e-tanhai
jag utha hamhama anwa-e-kashish ka hama-gir

jag uthi aaina-e-ru-ba-ru karwat leti
unche aafaq-shikan sail ki mastana nafir

ujli iksir si mitti wahin lau deti hui
jhumte pedon ke sae hain jahan naqsh-ara

partw-e-mah na hota to ye diwan-e-basit
is bayaban mein na tartib diya ja sakta

naghma-e-mauj bhi mauj is ka hai dariya gahra
lahja-e-'mir' ki girai ka jadu jaga

chandni ho na kahin nala-e-nai ki tajsim
ab to pahchanna mushkil hai kahan kaun hai kya