us se milne de nigahen dil-e-betab thahar
ishq ki khilne de rahen dil-e-betab thahar

koi dam mein nigah-e-yar hai uthne wali
ho na jae dil-e-betab teri pamali

dekhi jaegi na phir teri pareshan-haali
tu ne furqat mein tadapne ki qasam kyon kha li

dil-e-betab thahar ai dil-e-betab thahar
us se izhaar-e-tamanna to zara karne de

wo jafa-ju hai jafa-gar hai jafa karne de
us ko karne bhi de majruh-e-ada karne de

kyon karun tark-e-wafa mujh ko wafa karne de
dil-e-betab thahar ai dil-e-betab thahar

masti-e-husn ka ji bhar ke nazara kar lun
khugar-e-dard hun jine ka sahaara kar lun

gham judai ke ba-sad-shauq gawara kar lun
muztar-e-ishq hun kuchh zabt ka yara kar lun

dil-e-betab thahar ai dil-e-betab thahar
us se milne de nigahen dil-e-betab thahar

ishq ki khulne de rahen dil-e-betab thahar