gar aasman ko mahr-e-darakhshan pe naz hai
anjum pe naz hai mah-e-taban pe naz hai

gulshan ko apne sumbul-o-raihan pe naz hai
aur baghban ko apne gulistan pe naz hai

shakhon ko andalib ke naghmon pe naz hai
aur andalib ko gul-e-khandan pe naz hai

sabza ko apne gauhar-e-larzan pe naz hai
sahn-e-chaman ko husn-e-khiraman pe naz hai

shair ko apne husn-e-liyaqat pe naz hai
aashiq ko apne sina-e-biryan pe naz hai

ashkon ko garche apni rawani pe naz hai
aahon ko apni aatish-e-sozan pe naz hai

mansur-e-pak-baz ko dar-o-rasan pe naz
majnun ko apne chaak-e-gareban pe naz hai

zauq-e-fana pe naz hai garche patang ko
mahfil ko apni sham-e-farozan pe naz hai

isyan ko garche rahmat-e-yazdan pe naz hai
rahmat ko afw-e-kasrat-e-isyan pe naz hai

apni bala se gar koi nazan khirad pe ho
hum ko to ai 'puri' dil-e-nadan pe naz hai