ek mard-e-ba-safa tha doctor-zakir-husain
nek-dil farman-rawa tha doctor-zakir-husain

sada-dil sada-mizaj-o-ba-amal insan tha
khubiyon ka aaina tha doctor-zakir-husain

pasdar-e-hurriyat tha aabru-e-hind tha
ek sachcha rahnuma tha doctor-zakir-husain

us ke hathon mein amanat thi watan ki zindagi
ek amin-e-ba-wafa tha doctor-zakir-husain

us ke hathon mein salamat tha safina desh ka
yani apna nakhuda tha doctor-zakir-husain

aasman-e-ilm ka tha ek darakhshan aaftab
chashma-e-nur-o-ziya tha doctor-zakir-husain

mehrbani har sawali par kiya karta tha wo
be-bason ka ham-nawa tha doctor-zakir-husain

rahnuma-e-qaum ho kar bhi gada-e-qaum tha
bekason ka aasra tha doctor-zakir-husain

shara ka paband tha lekin tassub se bari
sach to ye hai dewta tha doctor-zakir-husain

ek darakhshanda sitara tha hamare desh ka
kya batae charkh kya tha doctor-zakir-husain