dur is duniya se ho koi jahan mere liye
is jahan mein to nahin amn-o-aman mere liye

ek jahan jis mein na ho fikr-o-taraddud ka hujum
ek jahan jis mein na ho shor-e-fughan mere liye

ek jahan jis mein mujhe amn-o-faraghat ho nasib
zindagi jis mein na ho bar-e-garan mere liye

ek jahan jis mein na ho kuchh ma-o-tu ka imtiyaz
ek jahan aazad-e-qaid-e-in-o-an mere liye

ek jahan jis mein na ho ilm-o-khirad ki dar-o-gir
ho na jis mein kawish-e-sud-o-ziyan mere liye

ek jahan jis mein na ho bughz-o-adawat ka wajud
aur mohabbat hi mohabbat ho jahan mere liye

ek jahan jis mein mera qaul-o-amal ho mo'atabar
har qadam par hon na jis mein imtihan mere liye

ek jahan jis mein na ho ishq-o-mohabbat ko zawal
husn ka gulshan ho jis mein be-khizan mere liye

be-riyai ho jahan ke basne walon ka shiar
aur mohabbat mein sadaqat ho jahan mere liye

zahir-o-baatin jahan ke rahne walon ka ho ek
hon na khanjar aastinon mein jahan mere liye

zindagani ho jahan ek khwab-e-shirin ki misal
har-nafas jis ka ho umr-e-jawedan mere liye

jis ka har zarra ho ek duniya-e-na-paida-kanar
jis ka har qatra ho bahr-e-be-karan mere liye

dur is duniya se ho aisa jahan mere liye
is jahan mein to nahin amn-o-aman mere liye