rah-e-manzil mein hum dushwariyon ka gham nahin karte
guzar jate hain hans kar fikr-e-pech-o-kham nahin karte

udate ho hansi waraftagan-e-ku-e-wahshat ki
khirad-mando tumhein to hum sharik-e-gham nahin karte

jamal-e-quds ki qurbat bhi kitni ruh-parwar hai
ki is manzil mein ahl-e-dil fana ka gham nahin karte

rah-e-manzil mein ehsas-e-fana aaghaz-e-manzil hai
ayan har bul-hawas par raaz-e-kaif-o-kam nahin karte

kabhi aflak ki rifat kabhi hai khak ki pasti
gila phir bhi tera ai gardish-e-paiham nahin karte

'munir' isar par apne hai tarikh-e-junun nazan
mata-e-zindagi lutne ka hum matam nahin karte