dil mein hujum-e-shauq-o-tamanna abhi se hai
aankhon mein ek surur ki duniya abhi se hai

hazir nahin hue hain abhi bazm-e-dost mein
lekin khayal-e-mahw-e-tamasha abhi se hai

anfas mein abhi se hai ek hashr-e-iztirab
ehsas mein qayamat-e-sughra abhi se hai

har har khayal mein hai abhi se bahaar-e-husn
har har nazar mein barq-e-tajalli abhi se hai

bazm-e-tasawwuraat ka aalam na puchhiye
zoron pe mehr-o-mah ka dhoka abhi se hai

kitne hijab hain nigah-e-shauq par abhi
aur samne wo chehra-e-zeba abhi se hai

saqi nahin sharab nahin mai-kada nahin
lekin faza mein masti-e-sahba abhi se hai

wo aaftab-e-husn abhi ru-ba-ru nahin
hasti tamam rashk-e-surayya abhi se hai

khud husn ne diya bhi nahin hai jawab-e-ishq
aur ishq hai ki husn-e-sarapa abhi se hai

wo aae bhi nahin hain nigahon ke samne
honton pe ek latif sa shikwa abhi se hai

hain kitni dur husn ki aaghosh-e-naz se
lekin supurdagi ki tamanna abhi se hai

aur phir is ehtimam-e-huzuri ke bawajud
kya jaane kyon firaq ka khatra abhi se hai