zindagi teri ai tair hai bahut hi masrur
gham se duniya ke nahin hota kabhi tu ranjur

teri rudad masarrat bhara afsana hai
josh-e-parwaz mein tu mahw hai diwana hai

udta rahta hai tu marzi ke mutabiq apni
kaif-o-rahat se hai har-dam teri mamlu hasti

din-o-duniya ke riwayat se begana hai
zindagi teri chhalakta hua paimana hai

dasht-o-sahra mein kabhi aur kabhi gulzaron mein
barg-o-gul par hai kabhi to kabhi kohsaron mein

sham ke waqt chahakna tera bhata hai mujhe
tera har git suhana pasand aata hai mujhe

subh-dam jab kabhi main su-e-chaman jata hun
jis taraf uthti hain nazren main tujhe pata hun

wadi-o-koh mein tu hai kabhi sahraon mein
aashiyan ek nahin koi tera duniya mein

hai darakhton pe kabhi dasht kabhi gulshan mein
bhul se aa bhi kabhi kash mere daman mein

aa ki naghme nae pur-lutf sunaun tujh ko
aa ki aaghosh mein lun aur khilaun tujh ko

hae kyon tair-e-azad tujhe wahshat hai
mera hote hue bhi mujh se tujhe nafrat hai

kis qadar hae alag mujh se phira karta hai
dur bekar tu kyon mujh se raha karta hai

wajh-e-beganagi ai kash bata de tu mujhe
sarguzasht-e-dil-e-masrur suna de tu mujhe