ek bar phir
faqiron ka bhes liye

mere dar par
ayyar aa khade hue hain

ye wahi to hain
jo ek bar pahle

mujh se mera naqsh le kar
hathon mein thama gae the

jannat ka ek hasin tukda
jo un ke jate hi

dozakh ban gaya tha
chand sal baad

wo mujh se ek aur naqsh le kar
is ke badle

de gae the ek samundar
jo is dozakh ko bujha sakta tha

lekin un ke chale jaane ke baad
wo samundar

tufan-e-nuh ban gaya
aur aaj phir

wo mere dar par khade hain
kandhon par liye hue ek kashti

aur naqsh hath mein liye
main soch raha hun

kya ye kashti
mujhe tufan se nikal sakegi?