shab-o-roz ke mashghalon se pare
koi aisa bhi lamha hai

jis ke tasawwur mein
kitne shab-o-roz

bechain guzre
dhadakti hui nabz dubi

aati-jati hui sans
rahon mein rukne lagi

andheron ke tufan mein
ek kashti bhi

sahil se ojhal hui
koi jagmagata sitara

falak ki bulandi se gir kar
kahin kho gaya

sard sara badan ho gaya
aur phir

jaise tarik goshe mein
koi kiran muskurai

koi aarzu hans padi
garmi-e-hasrat-e-dil bhi

thithure hue jism mein
tazgi bhar gai

chal padi
phir shab-o-roz ke mashghalon se ladi

zang-alud gadi