tumhein hai fakhr ki tum ho meri sharik-e-hayat
mujhe ye dukh hai

ki tum meri ham-safar thahri
main kam-nasib jo qismat se apni lad na saka

tere safar ko bahut tabnak kar na saka
tumhaari khwahishon ke khwab-nak daman ko

nae zamane ki ranginiyon se bhar na saka
magar main aaj bhi

ye e'tiraf karta hun
tumhi thi meri mohabbat

tumhi ho jaan-e-hayat
main khush-nasib ki tum ho meri sharik-e-hayat