kunj-e-qafas mein jalwa-e-sahn-e-chaman kahan
bulbul to dhundhti hai gul-o-yasman kahan

gum ho gai hai aa ke jahan rah-e-ku-e-dost
laya bhi to mujhe mera diwana-pan kahan

sarmaya-e-nashat sahi aamad-e-bahaar
lekin use nasib tera bankpan kahan

ai wo mere shabab ki raaten guzar gain
ab wo meri nashat bhari anjuman kahan

'shatir' chalo basaen dayar-e-habib ko
is kaamiti mein jalwa-e-gang-o-jaman kahan