bas ek chhoti si bahs par hi chale gae ho
kinara kar ke

bahut se dawe kiye the tum ne
main pahle din se hi jaanta tha

tamam dawe hain waqti jazbon ke zer-e-saya
kabhi kaha to nahin ye lekin

main jaanta tha
tumhein mohabbat nahin hai mujh se

faqat guman hai
main manta hun ki pyar aata tha mujh pe tum ko

so pyar aane ko pyar hona samajh rahe the
magar jo aata hai jaan meri

to us ka jaana bhi tai hi samjho
bas ek chhoti si bahs par hi chale gae ho