ai rahbar-e-manzil teri raftar ke sadqe
ai mehr-e-munawwar tere anwar ke sadqe

ai band-e-haq-go teri guftar ke sadqe
ai sahab-e-iman tere kirdar ke sadqe

to banda-o-sahab bhi tha muhtaj-o-ghani bhi
jalwon ka amin bhi tere lab pe arini bhi

har chehra-e-mardum ke khad-o-khal bure the
dekho jise us shakhs ke aamal bure the

mulla ke bhi pandit ke bhi aamal bure the
jo jhut ne phailae the wo jal bure the

sachcha tera din aur teri raat bhi sachchi
sachcha tera sauda teri har baat bhi sachchi

is dar ka pujari koi us dar ka pujari
maghrib ka pujari koi khawar ka pujari

mina ka pujari koi saghar ka pujari
qabron ka pujari koi banjar ka pujari

kasrat thi yahan shirk ki tauhid nahin thi
rozon ka bhulawa tha magar id nahin thi

tu hindu-o-muslim ke gunahon se tha waqif
mazhab ki sisakti hui aahon se tha waqif

to shoabada-bazon ki nigahon se tha waqif
to manzil-e-tauhid ki rahon se tha waqif

dar haq ke kabhi banda-e-haji pe khule hain
ganga mein naha kar bhi kabhi pap dhule hain

tu ne ye kaha sab se bada hukm-e-razai
tu ne ye kaha sanch ki qimat nahin pai

tu ne ye kaha so ke ye sab umr ganwai
tu ne ye kaha jhut hai sab zuhd-e-riyai

pur-mani-o-pur-maghz hain neki ke ishaare
har haal mein har rang mein rahbar hain hamare

main mast-e-mai-e-ishq hun tan rish-e-qalandar
tirath hai agar koi to is man ke hai andar

jaun main kahan sajde ko man mera hai mandir
hai azm mera fateh-e-dara-o-sikandar

gate hain jise dewta bhi chaudah ratan bhi
raqsan hai usi dar pe meri jaan bhi tan bhi

jo dars diya tu ne wo azmat ka amin hai
wo prem ki akhlaq ki khatam ka nagin hai

kundan jo na ho jae wo sona hi nahin hai
haq-go hai jo duniya hi mein jannat ka makin hai

sar jhukte hain sab ke teri sarkar mein aa kar
hum sajda-kunan hain tere darbar mein aa kar