zahe jamal zahe aalam-e-shabab tera
nazar ki chhed se bajta tha jab rabab tera

dam-e-widaa wo rangin udasiyan teri
hanuz yaad hai wo dida-e-pur-ab tera

wo jhum-jhum ke abr-e-bahaar ka aana
wo bijliyon ki tadap aur wo iztirab tera

wo ibtida-e-mohabbat wo chandni raaten
wo sehn-e-bagh mein hansta hua shabab tera

sanbhal-sanbhal ke meri samt wo nigah teri
bacha-bacha ke nazar mujh se wo khitab tera

mera harim-e-tamanna tha aasman se buland
us aasman pe chamakta tha aaftab tera

abhi nazar mein hai raaz-o-niyaz ka aalam
wo mera ijz-e-mohabbat wo pech-o-tab tera

kabhi sitam ke liye aur kabhi karam ke liye
nigah-e-shauq mein duba hua hijab tera

mera sawal ba-qadr-e-hujum-e-shauq-e-nihan
haya ki aad mein chhupta hua jawab tera

hanuz yaad hai 'jauhar' ko ai nigar-e-jamil
wo iltifat ke parde mein ijtinab tera