sarab-e-jaan ko jahan ki chamak samajhte rahe
raha wo ruh mein hum jism tak samajhte rahe

pata chala ki wo khak-e-haram ki khushbu thi
ki jis ko sajde mein gul ki mahak samajhte rahe

ajab thi kaifiyyat-e-jaan tawaf ke dauran
hum apne aap ko rashk-e-malak samajhte rahe

khuda ko dhundne ka kab hamein khayal aaya
hum apni zat ko us ki jhalak samajhte rahe

hasin waqt guzara khuda ke ghar mein 'adil'
zamin thi zer-e-qadam hum falak samajhte rahe