sehr-e-mausiqi hua phir gunj uthe gokul ke ban
raqs farmane lagi phir wadi-e-gang-o-jaman

phir shabab-e-mast nikla mal ke chehre par gulal
phir nikhar aaya bahaar-e-lala se husn-e-chaman

phir hawa-e-tund le kar aai holi ki bahaar
hath mein pichkariyan le kar chale phir mard-o-zan

phir junun-e-zindagi ko mil gaya nam-e-surur
phir nazar aane laga har sadgi mein bankpan

dholaken baje majire aur khadtalen bajin
phir fazaen ho gain bansi ki lai se naghma-zan

rang mein dubi hui hain gopiyan sar-ta-qadam
ude ude pile pile nile nile pairahan