sachche khwab aur jhuti aankhen
andhe raston ki hamrahi

anjaan tahayyur ka pani
aur istifhami lahjon ki

do-dhaari talwaren
teri qurb-sarae se

ye zad-e-safar sath liya hai
rukhsat ke rukhsaron par

aansu ban kar girte
lamhe ke hathon mein

apne hone ka aaina de
main us kanch badan se

be-nam andeshon ka
zangar khurach dalun

aur ujle pani mein dekh sakun
hijr-nagar ke tapte suraj ke niche

umr safar ka sahra kitne kos pada hai