id mehndi ka khushiyon ka
rangon ka khushbu ka

aur kanch ki chudiyon ki khanak
mein basi aarzuon ka ek nam hai

id inam hai
id ummid hai

id tajdid hai
id jaise koi raushni ki kiran

ek wade kahani fasane ki ya
hijr mausam mein lipte hue wasl ke

dukh ki tamhid hai
id ummid hai

ek ghar mein to khushiyon ka saman hai
ek ghar mein magar dukh ka tufan hai

id hairan hai
id hira nahin id moti nahin

id hansti nahin id roti nahin
ek aangan kahin koi aisa bhi hai

jis mein shahzadi sadiyon se soti nahin
shahzade ki jab did hoti nahin

id ke din bhi phir id hoti nahin