lo phir ufuq pe aaya nazar id ka hilal
phir yaad aaya mujh ko koi paikar-e-jamal

aane lage hain zehn mein mazi ke phir khayal
betab ho ke kar hi diya dil ne ye sawal

is sal bhi kisi ki mujhe ho sakegi did
is sal bhi 'zafar' ye kaho ho sakegi eid

sun kar sawal dil ka main ranjur ho gaya
patthar se jaise shisha koi chur ho gaya

pi kar gham-e-hayat ko makhmur ho gaya
utra nasha to kahne pe majbur ho gaya

kya us ki eid hogi jo bichhda ho yar se
sukhe hue shajar ko gharaz kya bahaar se