agar mujh se milna hai aao milo tum
magar yaad rakhna

main iqrar ki manzilen raste hi mein chhod aaya hun
ab mujh se milna hai tum ko to inkar ki sarhadon pe milo

jhinguron makdiyon ke janaze
main raste pe chhod aaya hun

purani kathaen mujhe khinchti hain
zamin ka zawal aaj zanjir-e-pa ban raha hai

khas-o-khak ke sare rishte
main ne har shai ko ab taj diya hai

koi mazarat bhi nahin hai
ki main mazarat ke sabhi jhute lafzon ko

apni lughat se nikal aaya hun
main inkar ke aasmanon pe phirta hua

main inkar ka wird karta hua
main zaminon pe aur aasmanon ki har shai pe

inkar ki surkh mohren lagata hua
aur dama-dam ki ek thap pe

main ne saton zaminon ke saton tabaq aaj raushan kiye hain
dekhna aasman raqs karne laga hai

zaminon ke sare khazane ubalne lage hain
sare dafine jadon se ukhad kar

mere samne hath bandhe khade hain
meri aawaz par machhliyan paniyon se nikal aai hain

aaj arz-o-samawat ki sari poshida khabren main sunne laga hun
main khush hun mujhe aagahi mil gai hai

badan ke masamon se ab aagahi shoala ban kar chamakne lagi hai
ajab kashf ki raushni hai

zamin apni sath se patal tak raushni mein naha kar
shab-e-awwalin ki dulhan ki tarah aaj sharma rahi hai

taza hawaon ki doshizgi sat rangon mein barahna hui hai
hayaon ki surkhi se chehra kanwal hai

ki meri dulhan ka badan phul hai
wo hawaon ke rangon mein dubi hui hai

hawaon ki doshizgi sat rangon mein barahna hui hai
har ek shai naqab apna ulte hue hai

sabhi bhed apni zabanen nikale mere samne aa gae hain
kitabon ke auraq khud bolte hain

zamin aasman ki har ek shai
samundar hawaen zaminon ki sathen

sathon ke niche sadiyon ke chehre
pahadon ki barfen barfon ke shorida pani

sadiyon ke pyase samundar ke sahil darakhton ke patte
phulon ke chehre aur roz-o-shab ke safed-o-siyah silsile

har ek shai mujhe apne bhedon se asrar se
aashna kar rahi hai

ajab aashnai ki lazzat mili hai
main is aashnai ki lazzat se sarshaar ho kar

muqaddas zamin ke purane dukhon ko gale se laga kar
main iqrar ki manzilen raste hi mein chhod aaya hun

main sari purani kathaen jala kar
faqat ek dama-dam ki aawaz par raqs karta hua

main iqrar ki sarhadon se pare aa gaya hun
ab mujh se milna hai tum ko

to aao milo
magar yaad rakhna

main iqrar ki dushmani par utar aaya hun
ab main inkar ki sarhadon pe milunga