iman ki tafsir qalandar ka tarana
samjhe to palat aae bulandi pe zamana

bebak nigahon ka falak-bos ishaara
sangin chatanon se guzarta hua dhaara

be-tabi-e-fitrat ki sukun-bakhsh kahani
shoalon se banai hui shabnam ki rawani

ashkon mein nahai hui ek mauj-e-tabassum
mallah ka girdab mein jis tarah tarannum

ilham mein takmil-e-haqiqat ki adaen
shahin ki parwaz mujahid ki nawaen

soi hui qismat ko jagata hua naghma
har sans ko hangama banata hua naghma

patjhad ki taraf dekh ke hansta hua baadal
sukhe hue kheton pe barasta hua baadal

ek barq sar-e-tur takallum ke sahaare
ek jalwa-e-mastur tarannum ke sahaare

ek shama rah-e-shauq mein manzil ki nishani
ek paikar-e-lafzi ki nawa-khez jawani

ek ruh jo insan ko insan bana de
ek dard jo jazbaat ko iman bana de

'iqbaal' ka har sher hai mai-khana-e-hasti
har rind ko deta hai jo paimana-e-hasti