kaun kahta hai hum tum juda ho gae
zindagi se achanak khafa ho gae

hijr-e-alam pe chhaya tha kuchh is tarah
wasl ke khwab waqf-e-dua ho gae

waqt-e-mizan mein jaane kya baat thi
tir jo be-khata the khata ho gae

hum ki jis but ko be-jaan samjha kiye
wo zamane mein kyun dewta ho gae

ek din yun hua husn-e-sarkar mein
muddai jo na the muddaa ho gae

kuchh irade bhi the kuchh tamashe bhi the
raqs ke aks bhi mawara ho gae

dekhte dekhte hum fana the magar
dekhte dekhte tum khuda ho gae