chehra us ka surkh gulab
hont bhare yaqut se hain

jhil si gahri kali aankhen
chand jabin pe rahta hai

zulfon mein ambar ki khushbu
taj-mahal sa us ka jism

ghunchon se bhari dali ki tarah wo
lahraati bal khati hai

be-khaufi be-fikri mein
mast magan si rahti hai

jaise madhuban ki baala
jaise hasina ganw ki

jaisi 'hasrat' ki mahbuba
jaisi pyari shah-'qutub' ki

jaise ghazal wo 'mir' ki ho
han wo bilkul aisi hi hai

han wo meri mashuqa hai
meri hi mashuqa hai wo