jo ilm mardon ke liye samjha gaya aab-e-hayat
thahra tumhaare haq mein wo zahr-e-halahil sar-basar

jab tak jiyo tum ilm-o-danish se raho mahrum yan
aai ho jaisi be-khabar waisi hi jao be-khabar

duniya ke dana aur hakim is khauf se larzan the sab
tum par mubaada ilm kei pad jae parchhain kahin

aisa na ho mard aur aurat mein rahe baqi na farq
talim pa kar aadmi banna tumhein zeba nahin

ilm-o-hunar se rafta rafta ho gain mayus tum
samjha liya dil ko ki hum khud ilm ke qabil na thin

aakhir tumhaari chup dilon mein ahl-e-dil ke chubh gai
sach hai ki chup kei dad aakhir be-mile rahti nahin