kahan the hum
samundar si kisi khwahish ke sahil par

hansti bhigti saat ki sangat mein
hansi kitni sajal thi

aankh ke har kunj mein
titli ki surat udti phirti thi

rah-e-shab mein ghana jangal
ya koi ajnabi rasta

hamare samne aata
to us diwar ke sine se kitne dur nikal aae

lahu ki tal par manzil
dhadak uthti thi pahlu mein

kisi ehsas ke dhundle
ufuq se din nikal aata

aur apne sath kya kya
qurmuzi kirnon mein lete

pyar ke sandes le aata
bahut takrim ke mausam

tah-e-jaan se ubharte the
duaon se bhare

sarsabz hathon ko yaqin tha
jhilmilate khwab

khushbu-kheziyon mein fard honge
aur taqarrub ke kisi

betab se pal ko jagaenge
to sarpat bhagti

ye umr ki hirni
kisi zanjir-e-wada mein

kahin ruk kar
hamein chahat se dekhegi

kahan hain hum
kisi viran sahil par

hamari aarzu ki kashtiyan
aundhi padi hain

aur jaise nind ke
be-tab halkore ki zad mein hain

agar suraj unhen us nind se
aazad karne ke liye

kirnon ko koi izn deta hai
to wo aankhon pe

apne hath rakh leti hain
gahri na-gawari se

aur ab to
wasl ki mishal bhi khwabida hai

sulgan se tahi hai
aur us ke dasht mein

har su barabar reshmi khwabon ki
nili rakh udti hai