guphaon jangalon se dur
hum tahzib ki dhun par

tamaddun ki rida odhe
safar karte rahe hain ek muddat se

magar ye ek haqiqat hai
ki is lambe safar ki ek saat bhi

hamare haq mein kuchh achchhi nahin nikli
darida ho chuki is darmiyan chadar tamaddun ki

giran-bar-e-samaat ho gai tahzib ki har dhun
ab aise mein

zamin ki shakl ko madd-e-nazar rakhiye
to ye mahsus hota hai

ki yun jari raha apna safar
to ek din

phir se na ja pahunchen
guphaon ke andheron mein