kal meri likhi ek nazm
ne khud-kushi kar li

jise arse pahle main ne likha tha
na jaane kyon

shayad naraaz thi mujh se
kai arse se qaid thi

diary ke safhon mein kahin
gumnam si ho chuki thi wo

mujhe bhi is baat ka gham hai
main ne us ka khayal kyon nahin kiya

kai martaba sochta to tha
zikr bhi karta tha apnon se

phir agli hi dafa
jab sunta tha kuchh english gane

zehn se utar jata tha us tanha nazm ka khayal