tu ai lakka-e-abr
tere badan ke musamat khaliyon mein

zahr-e-alam is tarah ghul raha hai ki
tera ek ek ang nila hua hai

tu is darja ro ki
talab ban jae jhil

tu ai chhoti-moti pahadi
pighalte hue gham ke lawe ko sine mein apne

chhupae rakhegi to kab tak
tu ro is qadar ro

ki ye jhil jo tere daman mein hai
az-karan ta-karan phail jae

tu ai aasman chhune wale pahad
tere dard ki aanch maddham hui hai kahan

ro bahut tez ro
ki ban jae dariya samandar

athah aur be-payan samandar
mera mashwara

lakka-e-abr chhoti pahadi
buland aasman chhune wale pahadon ko

ashkon se
nahlaega

aur main
apni hi aag mein andar andar

pighal jaunga