wo an-ginat khat
jo kitni hi zindagiyon mein

main ne tumhein likhe the
aur tum ne har ek khat

muskuraate hanste rote
kai kai bar padha

aur utha kar rakh diya
ek bar aur padhne ko

jaise ye khat hi tumhaara aur mera sab kuchh hon
in khaton mein hum ne kai rang dhaale

safed pakizgi sabz tazgi
surkh tamazat aur nili gahrai

tum aur main har rang mein dub kar tair kar
ladkhadate aur sambhalte rahe

kai hasin khwab bune kai tode
phir ek din achanak

tufan ke ek jhonke se
pani ke wo tamam rang

jin mein hum tum aur main
utar kar dubte aur tairte the

aag ke rang mein dhal gae
jis mein mere wo sare khat

jal kar rakh ho gae
aur tumhaari aankhon mein tairte aansuon ke parde mein

main ne ek dabi si muskan
ki parchhain dekhi