kis se puchhun ki jhut sach kya hai
tirgi kya hai raushni kya hai

kaun meayar-e-khair-o-shar samjhae
kaun takzib-e-jabr-o-jahl kare

waqt kis samt hai rawan paiham
wajh-e-takhliq-o-irtiqa kya hai

zindagi wahm hai haqiqat hai
shajar-e-dard saya-e-gham hai

kis se mafhum-e-ma-o-man puchhun
kaun taqdir-e-husn-o-ishq batae

kis se puchhun salib-o-dar ka raaz
azmat-e-jam-e-zahr kaun batae

aql-o-danish pe kufr ke fatwe
fikr-o-fan par hai tohmat-e-ilhad

is taqaddus-maab duniya mein
kis se puchhun main kaun hun kya hun

koi afsana koi khwab hun main
koi tahrir-e-na-tamam hun main

koi sahra-e-dard-o-karb hun main
khauf-o-khadshat ke jahannum mein

kitni sadiyon se jal raha hun main