mama ji ke rocket par hum chand ki sair ko jaenge
wahan ke bachchon se mil-jul kar dudh malai khaenge

didi sath na jaegi to kaun tumhein bahalaega
kaun karega kanghi patti kapde kaun pahnaega

hua karegi kanghi patti aur baadal nahlaenge
pariyan kapde pahnaengi tare munh dhulwaenge

mama ji ke rocket par hum chand ki sair ko jaenge
raat ko nind na aaegi to lori kaun sunaega

ghoda ban kar kaun chalega pith pe kaun bithaega
ghoda banna kya mushkil hai hum khud hi ban jaenge

lori teri chaal bahut hai baje par bajwaenge
mama ji ke rocket par hum chand ki sair ko jaenge

kapdon par gir jaega salan khana kaise khaoge
didi sath na ho to tum log kuchh bhi maza na paoge

mama ji ka rocket hai mama ji jo farmaenge
hum tum se wada karte hain didi ko le jaenge

achchha ab tum yahin pe thahro main jaldi se jata hun
apne pyare mama ji se puchh ke wapas aata hun

mama ji ke rocket par hum chand ki sair ko jaenge