tamam lafzon mein raushan har ek bab mein man
junun ke shelf mein hai ishq ki kitab mein man

ai man to khushbu ka nayab istiara hai
ai man tu ud mein ambar mein tu gulab mein man

khud apni mamta mein hi nur ka samundar hai
nahin hai aur kisi raushni ki tab mein man

wo jism kho ke badal si gai hai kuchh mujh mein
thi pahle sirf sawal ab hai har jawab mein man

mere sawalon ke sare jawab le aai
chali gai thi magar lauti phir se khwab mein man

main jab bhi zabh hui zindagi ke khanjar se
dukhi hai khwabon mein ek dasht-e-iztirab mein man

ganwa ke jism wo fursat se i mere pas
sisak sisak ke sunaya thi kis azab mein man

main man ki zinda nigahon ko khud mein jiti hun
har inqalab mein har dam har aab-o-tab mein man

mere uruj ka wo silsila inam-o-saza
mere zawal mein har zinda inqalab mein man

tujhe lubhane ko main satrangi bani thi man
ye ja chhupi hai tu kis parda-e-ghayab mein man

bandhi hain aankhen meri ab bhi maut ke pul se
hai har sukut mein khamosh iztirab mein man

umad rahe hain har ek pal se maut ke thatthe
wo ja rahi hai meri panja-e-uqab mein man

wo jism haar gai maut se magar mujh mein
wo ji ke goya hai phir maut se jawab mein man