mere thande badan ko aanch di hai apne sine ki
mere sukhe labon ko apne honton ki nami di hai

meri sanson ko apni dhadkanon ki ragni di hai
tera maqruz hun main

na soya farsh par to mamta ka ban gai bistar
kabhi barsat mein tapka purane phuns ka chhappar

mujhe banhon mein apni kas liya aur bichh gai mujh par
meri tanhaiyon ko loriyon se gudgudaya hai

mere ashkon ko tu ne apni palkon par uthaya hai
kahin tab ja ke ye masum bachpan muskuraya hai

teri ungli pakad kar dopahar ki dhup mein aksar
phira hun nange panw aur apni be-kasi dekhi

teri aankhon mein lekin zindagi ki raushni dekhi
meri khatir uthae hain musalsal bar-e-gham tu ne

meri khatir zamane bhar ki tu ne khak chhani hai
meri khatir andheron se kiran ki bhik mangi hai

tera maqruz hun main zindagi ab teri khatir hai
jo kal guzra wo aansu tha use aankhon se tapka de

nawed-e-subh-e-hasti hun mere mathe pe bosa de
tera maqruz hun main