tujhe hai shikwa ki shahr-e-nigar chhod ke main
nashat-e-sham-e-tarab ki bahaar chhod ke main

na jaane kaun si basti mein ja basa hun aaj
nai hayat ke be-rang daeron ki qasam

na koi dost na koi rafiq-e-manzil-e-gham
hayat-o-maut ke do-rahe par khada hun aaj

meri hayat hai khud ek be-karan sahra
na jis mein saya-e-gul hai na jis mein raqs-e-saba

na tere jism ki khushbu na pairahan ki damak
na chudiyon ke chhanake na qahqahon ki khanak

na aanchalon ki bahaaren na aarizon ke sharar
na tere sina-e-nauras ke zer-o-bam ka khumar

na zikr-e-surkhi-e-lab aur na teri chashm ki baat
teri jabin ka ujala na teri zulf ki raat

qadam qadam pe bagule rawish rawish pe babul
nazar nazar se ulajhte hue ye virane

hazar sadiyon ki afsurdagi samete hue
har ek zarre mein pinhan hain lakh afsane

na jaane kitni pur-arman dulhanon ke khwab
lahu mein role gae khak mein milae gae

na jaane azmat-e-adam ke kis qadar mahtab
qafas ki zulmat-e-shab-tab mein chhupae gae

na jaane kitne shahon ne ba-nam-e-lutf-o-karam
mahakti kaliyon se apne haram sajae hain

na jaane kitne shahon ne ba-faiz-e-jabr-o-sitam
gudaz-jism jawan-e-lab yahan churae hain

na jaane kitni nigahon se nur chhina gaya
dayar-e-dard ke mahlon ki raushni ke liye

na jaane kitne dilon se lahu nichoda gaya
nae khudaon ke chehron ki tazgi ke liye

na jaane kitne gharon ke diye bujhae gae
shabon ke raj-dularon ki zindagi ke liye

dayar-e-sabza-o-naghma se dur sahra mein
main chun raha hun wo anmol aansuon ke phul

jinhen bahaar ne thukra diya hiqarat se
jinhen khizaon ka daman bhi kar saka na qubul

tapak ke aankh se jo kho gae andheron mein
in aansuon se jalaenge zindagi ke charagh

ubal padengi jabinon se nur ki kirnen
sulag uthengi umangen dahak uthenge dimagh

nai hayat ke be-rang daeron ki qasam
utha ke subh-e-tamanna ke zarfishan-parcham

maqam-e-akhir-e-shab se guzar rahe hain aaj