tazkira dehli-e-marhum ka ai dost na chhed
na suna jaega hum se ye fasana hargiz

dastan gul ki khizan mein na suna ai bulbul
hanste hanste hamein zalim na rulana hargiz

dhundhta hai dil-e-shorida bahane mutrib
dard-angez ghazal koi na gana hargiz

sohbaten agli musawwir hamein yaad aaengi
koi dilchasp muraqqa na dikhana hargiz

maujzan dil mein hain yan khun ke dariya ai chashm
dekhna abr se aankhen na churana hargiz

le ke dagh aaega sine pe bahut ai sayyah
dekh is shahr ke khandaron mein na jaana hargiz

chappe chappe pe hain yan gauhar-e-yakta tah-e-khak
dafn hoga na kahin itna khazana hargiz

mit gae tere mitane ke nishan bhi ab to
ai falak is se ziyaada na mitana hargiz

hum ko gar tu ne rulaya to rulaya ai charkh
hum pe ghairon ko to zalim na hansana hargiz

kabhi ai ilm-o-hunar ghar tha tumhaara dilli
hum ko bhule ho to ghar bhul na jaana hargiz

shairi mar chuki ab zinda na hogi hargiz
yaad kar kar ke use ji na kudhana hargiz

'ghaalib'-o-'shaifta'-o-'nayyar'-o-'aruzda'-o-'zauq'
ab dikhaega ye shaklen na zamana hargiz

'momin'-o-'alwi'-o-sahbai'-o-'mamnun' ke baad
sher ka nam na lega koi dana hargiz

kar diya mar ke yaganon ne yagana hum ko
warna yan koi na tha hum mein yagana hargiz

'dagh'-o-'majruh' ko sun lo ki phir is gulshan mein
na sunega koi bulbul ka tarana hargiz

raat aakhir hui aur bazm hui zer-o-zabar
ab na dekhoge kabhi lutf-e-shabana hargiz

bazm-e-matam to nahin bazm-e-sukhan hai 'haali'
yan munasib nahin ro ro ke rulana hargiz