mere dil ko yaqin tha
kisi ne sach kaha hai

ki rishte mar nahin sakte
hamare darmiyan jab rabte na-mo'tabar thahren

to rishte kaam aate hain
ye tute rabton ko jod dete hain

mere dil ko yaqin tha
magar in chand barson mein

kuchh aise ajnabi mausam mere andar utar aae
samay ke sath ab mujh ko

yaqin hone laga hai
ki aisa bhi to hota hai

hamare darmiyan jab rabte na-mo'tabar thahren
to rishte sar patak ke mar bhi jate hain