kan pak jate hain duniya ki shikayat sun kar
kis ne jaana hai tumhein kis ka yaqin kar lun main

wo jo kahte hain ke tum aam si ladki ho jise
fikr apni hai kisi aur se matlab hi nahin

apni rozana ki routine mein mein jakdi jakdi
wo hi metro ki sawari wo hi aapa-dhapi

til na dharne ki jagah phir bhi pahunchna hai jise
apni har chiz sambhaale hue rahna hai jise

kaun aaya hai pas-o-pesh samajhne ke liye
kaun aaega ye taswir badalne ke liye

kitna aasan hai ilzamon se chhalni karna
kitna aasan hai do baaton se zakhmi karna

aise haalat se lad kar jise kuchh banna hai
pure karne hain kai khwab tamanna hai kuchh

us ke pairon ki ye zanjir hatani hogi
nasl-e-hawwa ki ye taswir mitani hogi

tum se raushan hai har ek ghar magar aisa kyun hai
tum tadapti ho to ye jag mera hansta kyun hai

bairi duniya ne tumhein thik se parkha hi nahin
meri aankhon se kisi ne tumhein dekha hi nahin