khel khilaune pahle kya the
nam suno tum bachcho kuchh ke

chhillam-chhu aur aankh-micholi
gilli danda kancha goli

andha bhainsa chidiya kanta
pichhe dekha koda khaya

lattu chakai aur tar pahiya
gidi kaudi dhul dhamaka

kushti kabaddi gend aur balla
chaar taraf tha ye ballu balla

gudiya rabad ki pahne sadi
chabi se wo chalti gadi

nachta bhaalu kudta bandar
bin ki lai par jhumta ajgar

khel khilaune ye the purane
koi bachcha in ko na jaane

sab out of date hue hain
in ke sab kam rate hue hain

in ka zamana khatm hua ab
daur purana khatm hua ab

wideo game ab chhaya ghar ghar
khel yahi hai ek taza-tar

is pe fida hain bachche sare
lag gae khel ab sare kinare