mohabbat jis mein laghzish bhi husul-e-kaamrani hai
mohabbat jis ki har kawish surur-e-jawedani hai

mohabbat jis mein gham bhi intiha-e-shadmani hai
mohabbat jis ki tafsir-o-wazahat be-zabani hai

mohabbat jis mein ruposhi bhi ek izhaar ho jae
mohabbat jis mein khamoshi lab-e-guftar ho jae

mohabbat jis ki aatish mein baqa pate hain parwane
mohabbat jis ki aabaadi mein hain aabaad mastane

mohabbat jis ki wusat ko nizam-e-hosh kya jaane
mohabbat jis ko afsana bana rakkha hai duniya ne

mohabbat ibtida kahte hain lafz-e-wah se jis ki
mohabbat intiha sunte hain lafz-e-ah se jis ki

mohabbat jis ki ranai gulon mein muskuraati hai
mohabbat jo nazar ko jalwa-e-fitrat dikhati hai

mohabbat jo kamal-e-husn ko yakta banati hai
mohabbat jis mein gham-agin tamanna chain pati hai

mohabbat jis pe qaem imbisat-e-ghair-fani hai
mohabbat jis se wabasta nashat-e-jawedani hai

mohabbat jis ko bahr-e-zindagi ka nakhuda kahiye
mohabbat jis ko aalam mein fana-na-ashna kahiye

mohabbat jis ko fanus-e-masarrat ki ziya kahiye
mohabbat jis ko lafz-e-am mein lutf-e-wafa kahiye

mohabbat jo bashar ke sath mitti hai na marti hai
mohabbat ruh mein jo arsh-e-azam se utarti hai

mohabbat jo kabhi gham hai kabhi aazad hasrat hai
mohabbat jo kabhi sarmaya-e-kaif-e-masarrat hai

mohabbat jis ki mushkil ek hayat-afroz lazzat hai
mohabbat jis ka har andaz jadu hai karamat hai

wo jazba hai jo aain-e-khirad se dur rahta hai
ye ehsas-e-muqaddas qalb mein mastur rahta hai