mahtab-badan gulab-surat
sar-ta-ba-qadam jamal-e-fitrat

honton par mogre ki kyari
raftar lachakti gham-gusari

chehre pe niagara barasta
aawaz mein jal-tarang bajta

naghmon se bhara hua piano
hai samne us ke jo do zanu

us ki makhrut ungliyon mein
wo loch hai wo gudaz-o-kham hai

chhuna nahin padta tar koi
bas lams ki baat sochte hain

rag rag tar-e-jaan ki manind
bajne lagti hai sarkhushi mein

khun naghmagiyon ke zer-o-bam ka
baje ke badan mein daudta hai

ji uthte hain jin ke sunne wale
isa-nafasi ki dad dete