raat bhar husn-e-tasawwur se jila pate rahe
khwab mere rukh-e-mahtab ko sharmate rahe

jin bahishton se main guzra hun wo yaad aati gain
shaikh kal khuld ki tarif jo farmate rahe

jannat-o-dozakh-o-araf se main guzra hun
khunki-e-husn ke shoale mujhe pighlate rahe

wo tahayyur wo nigahon ka tajassus he he
khwab se hosh ke aalam mein nazar aate rahe

raqs karta raha har zarra rah-e-ghurbat mein
kya bagule the mere gird jo mandlate rahe

hath khali tha mera aur bhari thin aankhen
jam-e-labrez mai-e-nab se takraate rahe

ajnabi chehre jo manus nazar aate the
apni khamoshi mein kya kuchh nahin farmate rahe

tut ke girte rahe ban ke shahab-e-saqib
sher-o-ilham ke moti kabhi barsate rahe

kuchh azazil o sarafil bhi raste mein mile
un ke changul se magar bach ke nikal aate rahe

qissa-e-ghaib chhida ya sukhan-e-bud-o-adam
shama ke gird patange the ki mandlate rahe

aanch sahte rahe furqat ki bhi aashob ki bhi
ji ko khwabon se khayalon se bhi bahlate rahe

kabhi be-sakhta phulon ki taraf utthe qadam
kabhi khushbu hi se hum ruh ko mahkate rahe

dhal gaya din to ubhar aae umidon ke charagh
na sahi chand sitare hi nazar aate rahe