bap ne bete ko bulwa kar ye puchha kya hua
imtihan ka aaj hi to tha natija kya hua

ye kaha bete ne fauran apna sina tan kar
aap khush honge yaqinan ye haqiqat jaan kar

kam hi karte hain kiya jo aap ki aulad ne
samne sab ke kaha mujh se mere ustad ne

hum tumhein jaane na denge is jamaat se abhi
tum hi raunaq ho yahan ki aur tum hi raushni

chain se agle baras bhi jaan-e-man rahna yahin
in ko jaane do agar jate hain baqi ham-nashin

sar-buland aur shadman school se aaya hun main
kharch copy aur kitabon ka bacha laya hun main

bap bola wah bete kar diya tu ne kamal
family mein is tarah ki hai kahan koi misal

fikr mat kar shan se aise hi tu school ja
ek baras kafi na ho to jo lagen utne laga

ye nasihat hai magar mat bap ki izzat se khel
pas tu be-shak na ho lekin kabhi hona na fail