wo jamal-e-nau-urusi ki phaban
wo tabassum-rez chashm-e-surmagin

sumbulin zulfon pe afshan ki chamak
wo jabin par tabish-e-mah-e-mubin

shokhiyon ki bijliyan jazb-e-nazar
ankhdiyon mein jazba-e-naz-afrin

kaif se labrez sahba-e-shabab
khun mein raqsan sharab-e-atishin

aarizon par chandni chhitki hui
wo lab-e-gulgun pe mauj-e-angbin

husn se chhanti hui doshizgi
shokh jalwon mein hijab-e-dil-nashin