ye kis dayar mein le aai zindagi mujh ko
jahan pe phul se chehre babul lagte hain

jahan pe saya bhi lagta hai dhup ki manind
nasim chalti hai ruk ruk ke aise sine mein

ki jaise phans kisi yaad ki atakti ho
jahan pe abr bhi suraj-misal lagta hai

jahan kiran ki zarb zakhm-e-dil khurachti hai
khile jo phul to patti se chot lagti hai

ye dahr wo hai jidhar baad-e-khush-gawar-e-sahar
dariche khol ke yaadon ke aah bharti hai

har ek chehre pe aawezan aankh hai lekin
kisi nazar mein koi rang-e-ashnai nahin

kisi ka lams bhi poron ke raste dil mein
diye jalata nahin is qadar andhera hai