khidkiyan band huin
naghma-e-didar ki lai tut gai

kho gaya dhund mein khamoshi ki
khilkhilati hui gul-rang sada ka chehra

lag gaya rang ki lahron pe ye kaisa pahra
tairti hai meri majruh samaat mein magar

gum-shuda naghma-e-didar ki lai
dekhti hain meri be-nur nigahen ab bhi

khilkhilati hui gul-rang sada ka chehra
mujh se kahta hai jo sargoshi mein

kyon koi rang ki lahron pe bithae pahra
rang ki lahr to ek khwab hai ek naghma hai

aur naghme ko bhala qaid kiya hai kis ne
khwab ko bhi koi zanjir pahna sakta hai