mutrib-e-khush-nawa zindagi ke hasin git gata raha
us ki aawaz par anjuman jhum utthi

us ne jab zakhm-e-dil ko zaban bakhsh di
sunne walon ne be-sakhta aah ki

ishq ke saz par jab hua zakhma-zan
shor-e-tahsin mein khud us ki aawaz dab si gai

mutrib-e-khush-nawa phir bhi tanha raha
tishnagi-e-masham us ko baad-e-saba ki tarah gul-ba-gul le gai

kasa-e-chashm ne partaw-e-gul bhi paya nahin
dard us ka kisi mahram-e-dard ke waste

dar-ba-dar shahr-dar-shahr phirta raha
dad o tahsin ke hangama-e-zauq-kash mein use

har taraf se malamat ke patthar mile
mutrib-e-khush-nawa pattharon se patakta raha apna sar

pattharon ko zaban to mili par takallum nahin
pattharon ko khad-o-khal-e-insan mile daulat-e-dard-o-gham kab mili

pattharon ko hasin suraten to milin dil nahin mil saka
pattharon ko mile panw par e'timad-e-safar kaun de

pattharon ko mile hath par azm-e-tesha-zani kaun de
sang sunte hain lekin samajhte nahin

dekhte hain magar farq karte nahin
baat karte hain mahsus karte nahin

tut sakte hain lekin pighalte nahin
gard ban kar ye ud jaen sanchon mein dhalte nahin

mutrib-e-khush-nawa pattharon se patakta raha apna sar
mutrib-e-khush-nawa pattharon ko sunata raha dard-e-dil

apna gham un ka gham sab ka gham
pattharon ne suna aur chup-chap hanste rahe

pattharon ki isi anjuman ka mughanni hun main
aur bedard be-his sitamgar patthar sunenge kabhi

un ka wo mutrib-e-khush-nawa shikwa-sanj-e-zaman
apne naghmat ki aag mein jal gaya

phir un hi ke manind patthar ka but ban gaya