ret ka musafir tha raat ki haweli mein
sirf raat bhar thahra jog le liya us ne

ret ki hatheli se phul ret ke chun kar
khwab ki saheli se rog le liya us ne

sirf ek lamhe ki mukhtasar kahani ko
ret ke musafir ne yun amar bana dala

kasa-e-mohabbat mein le ke bhik lafzon ki
aarzu ki aankhon mein ashk-e-tar bana dala

kaun ab tujhe jaane kaun yaad rakkhega
waqt ki udanon ke kaun aasmanon mein

tu ne rog pala tha kis tarah guzara tha
ek pal ke jiwan ko ajnabi makanon mein

aaj apne shair ko ye hamein batana hai
tu jo aag mein jal kar gulsitan banata hai

harf harf chun kar motiyon ki ladiyon se
subh ke sitaron tak sehn-e-dil sajata hai

jo bhi tu ne likkha hai sirf teri punji hai
sirf ek lamha hai sirf ek saat hai

waqt ke samundar mein sirf ek yahi lamha
be-karan alamat hai jazb-e-dil ki chahat hai