ghazab ki tapish hai
ghutan is qadar dil mein bahte lahu ki jagah

aag phunkne lagi hai
so rag rag mein chingariyan hain

sulagti hui surkh aankhon mein
aansu nahin halka halka dhuan hai

kisi nim-khwabida aatish-fishan ke dahane se
lawa ubalne ko bechain hai

shahr ka shahr luqma bane aag ka
dher ho rakh ka

is se pahle agar mera ek mashwara
ahl-e-darbar ko bar-e-khatir na ho

likhne walon ke hathon mein de do qalam
lafz ki bediyan khol do