zahmat-kash-e-hijran ka dil aur dukhate hain
ye kah ke mujhe log ab diwana banate hain

wo aate hain aate hain wo aate hain aate hain
lekin wo kahan aae aate hain na aaenge

chhitke hue tare bhi ab dubte jate hain
wo raat bhayanak aur zulfon ki tarah kali

hoti hi rahi jis mein jazbaat ki pamali
ta aan-ki hui zahir mashriq ki taraf lali

lekin wo kahan aae aate hain na aaenge
chhitke hue tare bhi ab dubte jate hain

jalte hue dipak bhi khamosh hue aakhir
udte hue jugnu bhi ru-posh hue aakhir

parwane ajal se ham-aghosh hue aakhir
lekin wo kahan aae aate hain na aaenge

chhitke hue tare bhi ab dubte jate hain
chahke wo parinde wo murghan-e-sahar bole

udne ke liye ab wo tayyar hain par tole
hum baithe ke baithe hain gham-khane ka dar khole

lekin wo kahan aae aate hain na aaenge
chhitke hue tare bhi ab dubte jate hain

masjid ke minaron se wo bang-e-azan aai
darbar-e-ilahi mein ab hogi jabin-sai

jo raat thi parbat si wo ghat ke bani rai
lekin wo kahan aae aate hain na aaenge

chhitke hue tare bhi ab dubte jate hain
betabi-e-dil meri aur wo shab-e-tanhai

patta jo kabhi khadka aahat jo kabhi aai
'najmi' yahi samjha main taqdir unhen lai

lekin wo kahan aae aate hain na aaenge
chhitke hue tare bhi ab dubte jate hain